La negativa del Conceyu a firmar les esixencies de la FIFA frena la candidatura al Mundial d'El Molinón

Nun hebo alcuerdu. La xunta d’última hora ente Conceyu, Sporting y RFEF, con presencia d’otres entidaes como la Universidá d’Uviéu o la Cámara de Comerciu, nun convenció a los representantes municipales y frena tanto la candidatura al Mundial 2030 como la reforma d’El Molinón.

“El Conceyu de Gijón/Xixón insiste na so negativa a aceptar les esixencies de la FIFA ensin conocer el costu total del proyeutu Asturies 2030 y la so financiación”, aseguraba nun comunicáu. “La única vía propuesta por Orlegi Sports, propiedá del Sporting, supón firma un cheque en blancu a la FIFA con dineru públicu, decisión qu’entiende una irresponsabilidá”, añadíen dende l’Ayuntamientu.

L’informe de la Universidá d’Uviéu conocíu güei, que marca un impautu económicu de 250 millones d’euros y la creación de 700 emplegos mientres dure la competición futbolística, tampoco nun convez al Conceyu. “El documentu nun aporta nenguna lluz sobre’l momentu actual del proyeutu al considerar imposible cuantificar los beneficios del eventu ensin conocer previamente’l costu”, espliquen.

Orlegi tien poco más de 24 hores pa facer unos últimos movimientos pa tratar de que’l Conceyu reconsidere la so posición, lo que pasaría por conocer la financiación del so proyeutu. Mañana cúmplese’l plazu pa firmar el documentu que permita siguir na carrera mundialista y que’l proyeutu del nuevu Molinón nun quede nun caxón, yá que’l so desendolcu ta condicionáu a ser sede.

Na imaxe, el nuevo El Molinón presentáu por Orlegi p'acoyer el Mundial.