La competición oficial en Segunda va arrancar nel José Zorrilla pal Sporting

El Valladolid va ser el primer rival del Sporting na Segunda División 2023-2024. El club roxiblancu, que solicitara xugar el primer partíu fuera pol cambiu del prau d’El Molinón, van enfrentase na fin de selmana del 13 d’agostu col equipu castellanu, recién descendíu, nel José Zorrilla.

Nun va tener un entamu de temporada cenciellu Miguel Ángel Ramírez. El Valladolid, por cuenta del seguru por baxar de categoría, va ser ún de los equipos con mayor marxe salarial, a lo que se podría sumar la operación del fichaxe de Larin, autor de 8 goles en Primera depués de llegar nel mercáu d’iviernu al executar el llunes la opción de compra de 1,5 millones d’euros que pautara col Brugge, que protagonizaría un trespasu millonariu a un equipu de la máxima categoría nes selmanes próximes.

La selmana siguiente’l Sporting va recibir al Mirandés, pa depués viaxar a Galicia pa enfrentase al Racing Club Ferrol –qu’entovía nun sabe si va poder xugar n’A Malata pola situación na que tán les instalaciones–, recibir al Burgos y enfrentase al Uviéu nel Carlos Tartiere Nuevu nel primer derbi de la temporada. Va ser la fin de selmana del 10 de setiembre.

La vuelta n’El Molinón, mentes, va tener llugar na xornada 26, que va xugase alredor del 11 de febreru. Nel tramu final de la temporada’l conxuntu xixonés va recibir al Andorra pa llueu dir a Leganés, despidise de l’afición col Eibar y zarrar la competición na Comunitat Valenciana col Eldense.

Un únicu fichaxe

El Sporting va entamar la pretemporada’l llunes colos primeros reconocimientos médicos, p’arrancar col trabayu’l miércoles. Namás va haber una cara nueva con respeuto al añu pasáu, la del porteru catalán Rubén Yáñez, que llega procedente del Málaga CF pa disputar la titularidá con Christian Joel, que torna a Xixón depués d’un añu cedíu nel Celta B.

Amás de la vuelta d’otros xugadores en préstamu, como Villalba Gaspar, Pablo García o Enol Coto, les otres úniques operaciones d’esti branu en Mareo son l’alcuerdu con Club América pa qu’Otero siga un añu más nel Sporting y la firma por 3 años de Jeraldino, xugador d’Orlegi Sports que tenía en propiedá Santos.

Na imaxe, el José Zorrilla nuevu. Semeya obra de Rastrojo baxo llicencia CC BY-SA 4.0.