La capiella ardiente del ex alcalde Álvarez Areces yá ta instalada en Xixón

|
La capiella ardiente del ex alcalde Álvarez Areces yá ta instalada en Xixón

Vicente Álvarez Areces, alcalde de Xixón ente 1987 y 1999, morrió na madrugada del xueves de sópitu al sufrir un derrame cerebral. El so cadabre, tres velase na Xunta Xeneral pela tarde y na mañana del vienres, llegó sobre'l meudía a la Casa Conceyu, onde s'instaló una capiella ardiente que ta siendo visitada por decenes de persones.

L'alcaldesa Carmen Moriyón, la ex primer edil Paz Fernández Felgueroso, compañeros de la Federación Socialista Asturiana (FSA) y d'otres formaciones polítiques, y personalidaes como'l padre Ángel, el presidente del Sporting Javier Fernández o'l de la Cámara de Comerciu y ex del Gijón Baloncesto Félix Baragaño, xuniéronse a una gran cantidá de ciudadanos pa despidir al socialista. La caxa, cubierta cola bandera de Xixón –a la que se sumaron depués les d'Asturies y España–, ta asitiada nel salón de receiciones, onde se formaron llargues fileres de ciudadanos que llegaron al esterior de la Casa Conceyu, que va poder visitase hasta les 19 hores.

Enantes tuviera n'Uviéu nel salón Europa de la Xunta Xeneral, onde tamién recibió la visita de políticos de tolos collores y destacaes personalidaes y ciudadanos. El domingu ta previstu un actu d'homenaxe na Llaboral organizáu pola FSA.

Una figura histórica de la política asturiana

Nacíu nel 1943, del barriu L’Arena, Álvarez Areces comenzó la so trayeutoria nel Partido Comunista de España (PCE) en plenu franquismu, involucrándose nel movimientu estudiantil na so etapa universitaria en Santiago de Compostela pa cursar Matemátiques. Llegaría a ser secretariu xeneral del partíu n’Asturies y miembru del Comité Central, pero saldría del partíu nel 1978 na conferencia de Perlora xunto con otros 109 delegaos por discrepancies pol so desarrollu, llegando ser espulsáu de militancia tiempu depués.

El so destín sería’l PSOE, que confiaría nél nel 1987 pa relevar a José Manuel Palacio al frente de l’alcaldía de Xixón. Álvarez Areces ganaría eses eleiciones y taría al frente del conceyu 12 años, hasta’l 1999, tiempos na que la ciudá vivió un importante llaváu de cara urbanísticu tres la reconversión industrial y nel que s'apostó por un modelu de ciudá con más importancia de la cultura y los servicios.

El siguiente pasu, la Xunta Xeneral, onde entró con una mayoría absoluta y na que permaneció como presidente del país tamién 12 años. Foi la época más escura d’Álvarez Areces, cola solombra de casos de corrupción nel so Gobiernu que nun acabaron por chiscalu personalmente pero que sí llegaron a los tribunales, como’l casu Marea.

Les sos polítiques fixeron por sacar a Asturies del aislamientu y la introducción del país na modernidá y el desarrollu, anque l'arecismu tamién tuvo como seña de identidá lo que se conocería polos sos críticos como  "cosmopaletismu", ye dicir, l'arrequexamientu de la cultura asturiana como ún de los elementos definitorios de la modernidá d'Asturies. Per otru llau, el sobrecostu d’El Musel o la ZALIA foron otros puntos prietos de la so xestión, amás de desafortunaos comentarios, como cuando calificó como “lleenda urbana” a la emigración forciada de la mocedá asturiana a Madrid y a otros puntos del Estáu y Europa.

Tampoco nun se destacó por sofitar la llingua asturiana, siendo bien conocíos los sos episodios cola Pita de la Xunta pola Defensa de la Llingua Asturiana. Sicasí, condicionáu pola necesidá de pautos con Izquierda Xunida, baxo los sos mandatos echó andar una direición xeneral de Política Llingüística y comenzó’l procesu de recuperación toponímica siguiendo’l mandáu de la Llei d’Usu y Promoción del Bable/Asturiana aprobada na llexislatura anterior a la so llegada al cargu.

Tres dexar la Xunta Xeneral pasó a Madrid pa facer llabores de senador. Ésta yera la segunda llexislatura na que resultaba escoyíu polos ciudadanos asturianos.

Semeya propiedá de la FSA.

Contador Estadistiques