Foro y PP aprueben los Presupuestos pal 2024 col votu de Suárez
|
21 Avientu, 2023 por Redacción
- Log in to post comments
Los 300,5 millones de les cuentes municipales suponen la cifra más alta de la historia de Xixón.
Esta mañaña celebróse un Plenu estraordinariu nel que Foro y el PP pudieron sacar alantre los sos primeros Presupuestos. Pa ello contaron col votu d'Óliver Suárez Rubio, ex edil de VOX y presidente de Divertia, algamando asina los 14 sofitos necesarios pa tener mayoría absoluta.
El restu de partíos posicionáronse en contra d'unes cuentes que foron criticaes por considerales irreales y pola falta de negociación. Presentáronse 59 enmiendes, una a la totalidá de VOX, de les que namái s'almitió una de Podemos, una partida p'acutar una zona pa perros nel Solarón.
"Algamamos un presupuestu realista que garantiza una execución efeutiva de los proyeutos planificaos", rescampló pela so parte María Mitre, conceyala de Facienda. Les cuentes del 2024 ascienden a 300.576.600 d'euros, 53 millones más que les del 2022, que se prorrogaron pa esti añu, mentes qu'el presupuestu consolidá, coles empreses municipales y organismos autónomos, asítiase en 408.861.743,67.
