El topónimu Xixón desapaez na Selmana Europea de la Movilidá

L'asturianu nun ta na cartelería nin nos diferentes coches llétricos d'empreses municipales espuestos na Plaza Mayor.

Iván Llera, presidente d’Iniciativa pol Asturianu, llamentó güei la falta de presencia del topónimu oficial Xixón y la desapaión del asturianu nes actividaes propies de la Selmana Europea de la Movilidá qu'entama'l Conceyu. "Faciendo un usu normal del idioma dientro d’estes campañes como la Selmana de la Movilidá, o mesmamente nos vehículos municipales, podemos llograr da-y visibilidá al asturianu y la toponimia oficial de la ciudá. Dende Iniciativa pol Asturianu pidimos que se siga rotulando en billingüe como se venía faciendo hasta agora", apuntó.

Esti coleutivu llamenta que na esposición de diferentes vehículos de distintes empreses municipales, como la EMA o EMULSA, asitiaos el llunes na Plaza Mayor, nun apaeciera la toponimia oficial de Xixón nos mesmos, al igual que tampoco lo faiga na cartelería propia de la Selmana de la Movilidá. "L’usu del asturianu con normalidá nun implica un coste mayor, nin xenera gastu estra. Amás, cola utilización de la toponimia en castellán, el Conceyu de Xixón ta incumpliendo la Llei d’Usu", recordó Llera.

L'asturianu, exe central d'aición

Iniciativa pol Asturianu entiende que l'asturianu nun pue quedar como "un elementu pa trabayar dende la Conceyalía de Cultura, tien que ser un exe central de la acción de gobiernu y tien que tar presente en toles estayes y empreses municipales, dende EMULSA, EMTUSA o la Policía Llocal, pa consiguir d’esta manera una presencia real y que permita la normalización del idioma"