El Sporting refuérzase con trés xugadores p'afrontar la batalla pola permanencia en Primera

|
El Sporting refuérzase con trés xugadores p'afrontar la batalla pola permanencia en Primera

A la llegada de Mikel Vesga la pasada selmana, sumóse esti martes, día caberu de mercáu, la incorporación de dos futbolistes procedentes del AS Monaco. Trátense del delanteru costamarfileñu de 2,03 metros Lacina Traoré y del llateral izquierdu Elderson.

Internacional absolutu en diez ocasiones con Costa de Marfil, cola que nun acudió a la Copa d'Áfríca que se ta celebrando en Gabón y na que'l combináu costamarfileñu quedó elimináu na fase de grupos pola República Democrática del Congu y Marruecos, Traoré comenzó la so trayeutoria profesional nel Stade d'Abidjan pa pasar a la lliga rumana con 18 años, en concreto al Cluj onde tuvo trés temporaes enantes de fichar pol Kuban Krasnodar rusu tres el pagu de 6 millones d'euros. Nesti conxuntu firmó'l so meyor rexistru goliador, con 18 tantos, cifra que-y sirvió pa dar el saltu al Anzhi con un trespasu d'unos 18 millones.

En xineru del 2014, el Monaco ponía los sos güeyos, comprándolu por unos 14 millones, cediéndolu al Everton pa lo que quedaba de temporada, onde se lesionó y nun tuvo continuidá. Nel conxuntu monagescu tampoco nun consiguió trunfar, polo que tres dos temporaes nel Principáu tornó esti añu a la lliga rusa, en concreto a les files del CSKA, onde disputó 14 partíos de lliga, anotando 5 goles, y 6 de Lliga de Campeones, con 1 tantu.

Elderson Uwa Echiéjilé, pela so parte, comenzó la temporada nes files del Standard, onde disputó 6 partíos de lliga, 1 de la Copa belga y 3 de Lliga Europa. De 29 años, ye 53 vegaes internacional con Nixeria –con 3 goles anotaos–, seleición que nun algamó la clasificación pa la Copa d'África que ta disputándose en Gabón, una competición que sí ganó nel añu na edición del 2013 en Sudáfrica.

Tres formase nel so país nes files del Wikki Tourists, y pasar depués al Bendel Insurance, dio'l saltu a Europa de la mano del Stade Rennais nel 2007. Trés temporaes en Francia con poca participación dieron pasu a una esperiencia nel Sporting Clube de Braga, onde amosó un meyor nivel y col que ganó la Copa na temporada 2012-2013. Tamién formó parte de la plantiya que perdió la final de la Lliga Europa col Porto (0-1, Falcao) l'añu siguiente, anque nun disputó esi partiu.

Nel mercáu d'iviernu de la 2013-2014 recibe una ufierta del AS Monaco, tornando asina a la lliga francesa. Nel club del Principáu tuvo al so mayor participación na temporada pasada, con 20 partíos lligueros disputaos, 2 de Lliga de Campeones –con 1 gol anotáu– y 4 de Lliga Europa, númberos que nun-y sirvieron pa continuar nel club esta campaña.

Tanto Traoré como Elderson aporten a Xixón en calidá de cedíos, al igual que Vesga.

Rachid, al Tenerife

La única salida d'esti mercáu d'iviernu ye la de Rachid. El mediu alxerín va completar la temporada en Segunda División nes files del Tenerife, conxuntu que ta desendolcando una gran campaña, lluchando na zona que da accesu al play-off d'ascensu.

Mentes, Carlos Castro va siguir a les órdenes de Rubi pese al so deséu de salir en busca de los minutos que nun ta atopando nel Sportingu.

Contador Estadistiques