El Sporting más reconocible pon el ramu con victoria a una temporada pa escaecer

|
Sporting 1-0 Cádiz (8 de xunu del 2019)

José Alberto tiró de la cantera contra'l Cádiz (1-0). El segundu proyeutu de Montes Torrecilla, que va siguir nel club, un fracasu.

El Sporting finó la temporada 2018-2019 en novena posición con 61 puntos, mui lloñe de los puestos de ascensu direuto (18 puntos) y de los que dan accesu a les eliminatories pa xubir a Primera (7 puntos), y 2 perbaxo del Uviéu, que terminó octavu. A falta de 3 xornaes los roxiblancos yá quedaren ensin opción nenguna depués d'un añu mui irregular nel que, salvo al principio de Lliga, nunca tuvo nos puestos de privilexu.

Sicasí, los 8.602 aficionaos que vieron el partíu del sábadu n'El Molinón –la entrada más baxa en Lliga de la temporada y de los últimos años–, ente los que s'alcontraben delles decenes de siguidores del Cádiz, equipu que llegaba con opciones de clasificase, anque dependía d'un Deportivo que nun falló, pudieron disfrutar d'un once por fin reconocible. El Sporting salió al campu con cuatro asturianos (Canella, Nacho Méndez, Pedro Díaz y Pelayo Morilla), a los qu'hai que sumar otros trés de la cantera o con pasáu nel filial (Christian Joel, Juan Rodríguez y Cristian Salvador), y los cambios foron Pablo Pérez, Gragera y Cordero, una alineación de futuru que se llevó la victoria gracies a un gol de Nacho Méndez cola derecha nel minutu 14 tres recoyer un balón que nun pudo blocar Cifuentes tres un disparu duru de Djurdjevic.

Una alineación, poro, de futuru, que gustó per momentos a los siguidores roxiblancos y que marca'l rumbu qu'ha de siguir el club, alloñáu de la so política de cantera nos trés años últimos, que se zarraron con un descensu y dos intentos d'ascensu fallíos a pesar de contar con ún de los presupuestos más altos de la categoría. Éstos dos tuvieron como responsable deportivu a Miguel Montes Torrecilla, que yá trabaya nel so tercer proyeutu al frente del Sporting, nel so últimu añu de contratu col club, que comenzó ayeri cola renovación por 3 años del veteranu Babin.

Contador Estadistiques