El Sporting encara l’aniciu de la temporada cola única cara nueva del entrenador

David Gallego va ser la única novedá que presente’l Sporting nel arranque de la temporada de Segunda División con respeuto a l’anterior. La imposibilidá de fichar al non producise salíes de los descartes del téunicu catalán pa rebaxar el gastu obliga al club a tirar de Mareo, solución tan repetida na historia del club.

La cantera, siempre escaecida n’época de vaques gordes, recupera protagonismu esta campaña nel club xixonés pola situación económica. El mediu Gragera y el llateral izquierdu Pablo García apunten a titulares nel partíu d’esti sábadu (18.15 hores, El Molinón) contra la debutante Unión Deportiva Logroñés –l’antiguu Varea que pretende cubrir el güecu del desapaecíu Club Deportivo Logroñés–, sumándose asina a los Manu García, Bogdan o Pedro Díaz.

La herencia de la xestión de Miguel Montes Torrecilla y la mengua d’ingresos pola crisis faen que Franciso Javier Vicente Rico, responsable nuevu de la estaya deportiva, nun pueda reforciar la plantiya ensin que se produzan salíes que nun lleguen. Asina, el Sporting va presentar la mesma cara que la campaña anterior, cola ausencia única de Damián Pérez y Murilo, xugador que finó la so cesión, además de Molinero, con un alcuerdu pa renovar nel momentu nel que’l club pueda axustar el gastu.

Contar cola base de la temporada anterior, na que’l club xixonés, con 38 goles, foi’l segundu que menos recibió de la categoría, permite a Gallego empezar a construyir la so idea futbolística dende la seguridá defensiva. El deficit del equipu va siguir tando na falta de gol, col oxetivu puestu en fichar un estremu qu’ayude a dar velocidá y verticalidá al ataque xixonés –l’escoyíu ye Jordi Mboula, futbolista de 21 años del Monaco que tuvo cedíu la temporada pasada Cercle Brugge belga y nel Huesca, col que ganó’l títulu de Segunda– y na recuperación del olfatu por parte de Djurdjevic, delanteru que paez tener la confianza de la direición deportiva y cuerpu téunicu y que la temporada pasada namái vio puerta en 6 ocasiones.

Semeya: Camiseta de la temporada 20-21.