El Sporting da una allegría a l'afición nel so debut como llocal

|
Sporting 2-0 Nàstic (26 d'agostu del 2018)

Venció con superioridá al Nàstic por 2-0 con tantos de Hernán y Lod, ún en cada parte.

La primer victoria de la temporada llegó nel primer partíu n'El Molinón del Sporting. Los de Rubén 'Pipo' Baraja, que rescataron nel aliendu últimu un empate n'Alcorcón depués d'un mal partíu, dieron otra imaxe énte'l conxuntu de Tarragona, a lo que contribuyó la llegada de refuercios como l'estremu Álvaro Jiménez y el delanteru serbiu Uroš Đurđević, fichaxe más caru de la historia del club xixonés al superar los 2 millones d'euros la operación col Olympiacos.

Intervendría l'atacante na xugada del primer gol al recuperar un balón nel minutu 24 nel centru del campu y arrancar una contra na qu'abrió a la izquierda a Sousa, que trató de devolver el balón al balcánicu provocando la intervención de Mejías, que dexó franca la pelota a Hernán pa superar a Barragán. El Nàstic namái reacionó a esti tantu al comienzu de la segunda metá, pero ensin poner en peligru seriu a Mariño.

Nel tramu final saldríen al terrén de xuegu Nacho Méndez y Lod, que fabricaríen el segundu tantu nel minutu 81. El canteranu protagonizaría una guapa xugada pela derecha hasta ganar llinia de fondu y centrar en busca del filandés, que nun perdonó nel so debú.

Con esti trunfu'l Sporting suma 4 de los 6 puntos en xuegu, formando parte parte del grupu d'equipos que sigue al Málaga, únicu conxuntu que consiguió ganar los sos duelos a la espera de lo que faiga'l Mallorca esta tarde nel Wanda Metropolitano (20 hores) na so visita al Rayo Majadahonda. Los de Baraja volverán a xugar en casa na xornada siguiente, no que va ser el so primer enfrentamientu col Extremadura UD (domingu, 16 hores), club debutante na categoría.

Contador Estadistiques