El Sporting crea la ‘Grada de Animación 1908’

|
Sporting 1-2 Valladolid (10 de xunu del 2018) pa YeXixón

La campaña d’abonaos 2018-2019 del Sporting yá ta en marcha, colos precios conxelaos con respeuto a la campaña pasada. La mayor novedá ye la creación de la ‘Grada de Animación 1908’ col oxetivu de controlar a los ultres del fondu sur y evitar l'accesu de xente con antecedentes.

El 31 de xunetu ye la fecha llende pa renovar, mentes que del 2 al 4 d’agostu va habilitase un periodu pa que les persones interesaes en cambiar d’asientu puedan ver si hai disponibilidá nes zones de la so preferencia. El plazu pa los abonaos nuevos va abrise’l 6 d’agostu.

De cara a esta temporada van producise cambios nel Fondu Mozu, onde s’asitia’l grupu Ultra Boys. El Sporting va crear la ‘Grada de Animación 1908’, destinada p’aficionaos con edaes comprendíes ente les 16 o 26 años, cola posibilidá de delles esceiciones.

L’accesu a la mesma va ser restrinxíu y los abonaos ehí situaos han de firmar un documentu de “condiciones de pertenencia, accesu y permanencia” nel fondu. Ente los munchos puntos a los qu’obliga al compromisu destaca’l non amosar conductes de calter racista o xenófobes tanto dientro como fuera d’El Molinón y el declarar si se cuenta con antecedentes penales.

Contador Estadistiques