El Sporting B va tener al Cornellà como primer rival nes eliminatories pol ascensu a Segunda

|
Cuadru fase d'ascensu a Segunda División A

El sortéu de la primer eliminatoria pol ascensu a Segunda División A, celebrada'l llunes en Las Rozas, empareyó al Sporting B col Cornellà. El conxuntu catalán foi'l cuartu clasificáu del grupu IV de la Segunda División B y cuenta con un campu de prau artificial.

El Sporting B va debutar nuna fase d'ascensu a Segunda División A col actual formatu'l domingu al meudía en Catalunya col Unió Esportiva Cornellà, equipu que na so tercer temporada na categoría de bronce consigue metese na llucha por dar el saltu de categoría. Nun va ser un rival fácil pa los de José Alberto, que van tener la dificultá d'un prau artificial en non mui bon estáu y de dimensiones reducíes.

Daes les carauterístiques del so campu, el xuegu de los catalanes ye básicamente direutu, dalgo a lo que tán avezaos los roxiblancos al contar nel so grupu con equipos mui físicos. El Cornellà finó en cuartu llugar nel grupu III, que tuvo domináu pol Mallorca, tres el Villarreal B y el Elche, y con cuatro puntos de ventaya col Ontiyent y l'Ebro.

El restu d'eliminatories de la vía llarga son Celta B-Marbella, Bilbao Athletic-Villarreal B, Extremadura UD-Fabril, Murcia-Elche y Fuenlabrada-Real Sociedad B. Mentes, van ser equipos de Segunda la temporada próxima los ganadores de los crucies Cartagena-Rayo Majadahonda y Mallorca-Mirandés.

Contador Estadistiques