El sector movilízase énte’l vetu ideolóxicu de Festexos: 4.200 firmes en defensa de la música n’asturianu

La práutica totalidá de la escena musical asturiana y artistes y grupos relevantes de la estatal, como Rozalén, Rigoberta Bandini, Fermín Muguruza, Hamlet, Vetusta Morla, SKA-P o La M.O.D.A., sofitaron el manifiestu ‘Música n’asturianu sí’ ente’l vetu ideolóxicu de VOX dende Festexos al idioma. En total recoyéronse 4.200 firmes.

La Plaza Mayor foi’l llugar escoyíu pa dar ayeri una rueda de prensa a la qu’acudieron numberosos músicos y ciudadanos pa sofitar el mensaxe del sector, al que s’incorporaron tamién la Sociedá Cultural Xixonesa; l’asociación Grana, N’Alcordanza de Yolanda Huergo; la Caja de Músicos; la Sociedad Cultural Gesto; y l’Atenéu Obreru de Xixón, “pol simbolismu que supón que dende la Casa’l Conceyu se nos quiera escluir d’actuar n’eventos festivos que se faen nesta mesma plaza y n’otros espacios públicos”.

Leticia Baselgas y David Varela exercieron de voceros d’un comunicáu na se solicitaba a l’alcadesa Carmen Moriyón que “rechace contundentemente les palabres y les intenciones de la so compañera de gobiernu” y el cese de la conceyala de VOX de Festexos, Sara Concepción Álvarez Rouco, “lo que tamién implica que la empresa pública Divertia nun tendría de tar en manes de quien comparte esos mesmos planteamientos”.

D’igual forma presentaron una propuesta de moción a PSOE, Foro, Convocatoria por Xixón y Podemos “en defensa y promoción de la música y cultura n'asturianu nos eventos festivos, educativos y culturales de Gijón/Xixón” pa llevar a Plenu cola intención de que “esta ciudá garantice que pueda haber actuaciones d’artistes y entidaes qu’utilicen l’asturianu como llingua d’espresión. Que lo garantice y tamién que lo promueva a traviés de Divertia y de les conceyalíes de Festexos, de Cultura y d'Educación”.

Los promotores, llueu de la rueda de prensa, metieron comunicáu, moción y firmes nel Rexistru, un total de 4.200 apoyos con nomes relevantes de la escena estatal. Fermín Muguruza, Xavi Sarrià, Rozalén, Rigoberta Bandini, Hamlet, SKA-P, Reincidentes, Vetusta Morla, Dakidarría, Tahúres Zurdos, Lujuria, La M.O.D.A, Ladilla Rusa o Zoo, son dalgunos de los artistes o grupos de fuera d’Asturies qu’apaecen na llista.

Na semeya, Leticiai Baselgas llee'l comunicáu, con Varela detrás.