El Plenu revoca'l boicó a Israel cola única presencia de Foro y PSOE

|

El PP y Ciudadanos algamen el so oxetivu de revocar la incorporación del Conceyu de Xixón a la campaña Boicó, Desinversión y Sanciones (BSD) a Israel pola so ocupación de Palestina con motivu del partíu de la seleición hebrea cola estatal n'El Molinón. Sicasí, foi colos votos de Foro y el PSOE en solitariu.

Nin les dos formaciones interesaes n'anular la moción aprobada pol Plenu de xineru del 2016 presentada pol PSOE, Xixón Sí Puede y Izquierda Xunida (IX) –que contó cola astención de Foro, PP y Ciudadanos–, nin la candidatura de xunidá popular nin la coalición tuvieron presentes na votación, polo que foristes y socialistes quedaron solos. Los cuatro grupos municipales abandonaron la sala al considerar que nun cumplía la llegalidá esta moción nueva al ser presentada per vía d'urxencia col Plenu yá empezáu y ensin qu'Alcaldía avisara a los conceyales.

Xixón Sí Puede yá anunció que llevaría l'asuntu a los tribunales, mentes que PP y Ciudadanos celebraron la revocación del apoyu de Xixón a la BSD pese a que tamién víen irregularidá nel procedimientu. La polémica comenzó'l miércoles cuando'l PSOE quixo aprovechar la moción de les dos formaciones p'anular la que los mesmos socialistes presentaron un añu enantes pero reivindicando'l respetu a les resoluciones de la ONX y la XE sobre Palestina qu'Israel nun respeta.

Nun hebo nengún alcuerdu, polo que'l PSOE quixo presentalu ayeri por moción d'urxencia señalando agora'l respetu a les resoluciones daes pol Gobiernu estatal sobre'l conflictu ente Israel y Palestina, dalgo supuestamente irregular al facelo col Plenu comenzáu, lo que llevó a la esbandanda de tolos grupos a esceición del socialista y el de Foro.

Mala imaxe

La razón del cambiu de posicionamientu del PSOE y del Conceyu de Xixón vien por una supuesta mala imaxe que daría la ciudá con motivu del partíu ente España y Israel que va xugase'l 24 de marzu n'El Molinón. El Gobiernu d'Israel yá anunciara'l so descontentu pola escoyeta por parte de la Real Federación Española de Fútbol d'una ciudá firmante del BSD pa la disputa d'esti choque valederu pa la clasificación pa la Eurocopa del 2018.

Contador Estadistiques