El final más triste

|
Sporting 1-2 Valladolid (10 de xunu del 2018) pa YeXixón

El Valladolid tardó 23 minutos en golpiar al Sporting n'El Molinón y 8 más en sentenciar una eliminatoria na que'l Sporting nunca dio la talla. El primer proyeutu deportivu de Torrecilla fracasa tres perder les opciones d'ascensu direuto nel tramu final de la competición.

La Primera División va siguir ensin equipos asturianos tres los fracasos del Sporting y Uviéu nesta campaña. El conxuntu roxiblancu, clasificáu pa les eliminatories pol ascensu como cuartu tres firmar un espantosu final de competición, viose superáu pol Valladolid, quintu, tanto en Zorrilla (3-1) como n'El Molinón (1-2)

Nun campu con un ambiente al nivel de les grandes cites, el Sporting nun foi quien a meter el mieu nel cuerpu a los de Sergio González y, pese a que Santos desperdició una ocasión clara al buscar l'autopase y Rubén García pudiera marcar con un remate forzáu tres una internada del uruguayu pela izquierda, foi'l pichichi de la categoría, Mata, el que golpiaría primero.

El tantu llegó tres una xugada que naz nun corner rasu que provocó una contra del Valladolid na que'l centra'l Kiko Olivas avanzó ensin presión y que finó col balón nes botes del goliador blanquivioleta, que tuvo tiempu pa buscar un derechazu a la escuadra de Mariño. Ocho minutos depués los castellanos sentenciaríen la eliminatoria con un disparu llonxanu, otra vegada ensin oposición, d'Óscar Plano.

Carmona, tres un penalti a Santos, maquillaría la derrota de penalti na segunda metá d'una eliminatoria que dexa al Valladolid como rival del Numancia, que superó en La Romareda al Zaragoza por 1-2 (2-3 nel global), nel crucie definitivu pol ascensu. Mentes, el Sporting de Miguel Montes Torrecilla ha de comenzar a preparar la temporada 2018-2019 en Segunda tres un fracasu na planificación deportiva del salmantín, campaña na que los roxiblancos van ver reducida la so capacidá económica pa la conformación de la plantiya, que, salvo sorpresa, liderará Rubén 'Pipo' Baraja, téunicu con contratu en vigor.

Contador Estadistiques