Décimu aniversariu de la revista "Formientu"

La revista de lliteratura moza Formientu cumple diez años y va celebralo con un actu nel xixonés Toma 3.

Esta celebración va principiar el xueves 27 a les 19 hores y nella van participar dalgunos de los munchos escritores qu'espublizaron nella nesti tiempu. L'actu va presentalu Vanessa Gutiérrez y va consisitir nuna timba poética.

"Esta fecha tan especial queremos abrila a tolos collaboradores de la revista a la llargo de los caberos diez años, pa que participéis con testos propios interviniendo nel actu", espliquen dende Formientu. Tamién va abrise l'eventu a tolos presentes que quieran participar na timba poética.

D'igual forma, la organización recuerda qu'entovía ye posible unviar testos pa la espublización nel númberu 15 de la revista tres ampliar los plazos previstos pa los menores de 30 años. Los autores han d'unviar les sos creaciones acompañaos de la fecha y llugar de ñacimientu, el númberu teléfonu y una pequeña biografía al corréu revistaformientu@gmail.com.