Conferencia sobre los procesos socesorios na monarquía asturiana

|
Conferencia sobre los procesos socesorios na monarquía asturiana

Esti martes 18 d'abril Fe Santoveña va falar de la socesión na monarquía asturiana de cómo y por qué desendolcáronse los derechos socesorios como lo fixeron. 

Con la charra titulada 'Príncipes 'Astures: claves antropolóxiques de la socesión na monarquía asturiana (familia estensa y sistemes d'herencia)' , Fe Santoveña va traer  un puntu de vista antropolóxicu novedosu sobre la socesión nel reinu d’Asturies. Lloñe d’analizar cuestiones polítiques y enguedeyos económicos nes lluches pol poder, nesta conferencia fadrase un averamientu dende’l puntu de vista de l’Antropoloxía Social y Cultural, particularmente sobre les rellaciones de parentescu y les llexitimidaes heredatibles. Los sistemes «cognaticios» como referentes p’afitar el llinaxe familiar ufren nueves ferramientes que permiten nun solo pescanciar les rellaciones ente llinaxes, sinon tamién decatase de quiénes y en qué momentu foron escoyíos o refugaos como los 'principales' pa exercer el poder na monarquía ástur.

Fe Santoveña ye doctora n’Historia pola Universidá d’Uviéu (2015) con un sobresaliente cum laude y doctorando nel Departamentu d’Antropoloxía Social y Cultural de la Facultá de Filosofía de la UNED. Tien dos Máster n’Investigación antropolóxica y les sos aplicaciones, UNED (2014) y n’Historia y análisis sociocultural, Universidá d’Uviéu (2012).

Esta conferencia ta organizada por l'asociación cultural Ástura y va ser el martes 18 d'abril a les 19:30 hores na sede del Atenéu Obreru de Xixón (C/Cuadonga, 7).

Contador Estadistiques