Caldones celebra les fiestes del Carme

|
Caldones celebra les fiestes del Carme

La corta l’arbolón el xueves precede al VII Refaciendo Tradiciones dientro de les fiestes del Carme de Caldones. Tres yantar l’arbolón y el pregón a cargu de Berto Álvarez Peña va entamase la foguera y una nueche en danza, cola posibilidá d’acampar nel llugar.

A les 19 hores ta previstu l’actu de carretar y yantar l’arbolón ente los vecinos de la parroquia, no que va ser l’aniciu d’una xornada festiva que pretende ser llarga. A les 21 hores, l’espertu Álvarez Peña va lleer ‘L’arbolón, los mayos y les fogueres: rituales de fecundación’.

Yá de nueche va entamase una foguera y va comenzar el tiempu pal baille. Los Magníficos de Garbelles, Los Pepinos y Nun Tamos Toes van encargase de poner la música pa la danza.

La organización de la fiesta dispón de barra pa poder beber y comer. Mentes, habilita un prau pa que los asistentes que quieran disfrutar de la sidra y evitar garrar llueu’l coche puedan acampar.

Hasta’l llunes

Mañana al meudía, en collaboración col Festival de Música Antigua de Xixón, va comenzar l’actividá ‘La festividá y la recuperación de les tradiciones’. Yá pela nueche va haber corderada –previu encargu, al igual que’l restu de comides nestos díes festivos– y una verbena con Versión Original y la discoteca móvil Vas Bailar.

El domingu, a les 8 hores, va celebrase l’alborá de Caldones, con Los Magníficos de Garbelles. A les 12.30 hores va ser la misa, la procesión y la puya’l ramu, con corderu a la estaca y paella de mariscu pa la xinta.

La verbena del domingu va tar animada con música pinchada por Vas Bailar, que repite’l llunes, nesta ocasión xunto col grupu Assia. Esta xornada, el Carme, ye cuando va entregase’l bollu a los vecinos.

Contador Estadistiques