Baraja pierde'l derbi (2-1) y el cargu d'entrenador

|

José Alberto López ye dende esti llunes entrenador nuevu del Sporting tres l'anuncia del cese de Baraja fecha'l domingu dende'l club. La derrota nel derbi col Uviéu tres otru deceicionantes partíu del equipu terminó por condenar al téunicu castellanu.

La lesión namái comenzar el derbi d'Isma Cerro, que podría dicir adiós a la temporada, nun aburruntaba nada bono pal Sporting. Una xugada llarga depués, na que la defensa roxiblanca nun foi quien a mandar el balón lloñe del área, terminaba con un balón francu pa Ibrahima que'l senegalés mandaba a la rede con un remate acrobáticu de guapa factura.

El gol nun despertó a un dormíu cuadru xixonés, que se vio superáu nestos primeros minutos pola intensidá del Uviéu d'Anquela, téunicu que recupera creitu col trunfu. Nel minutu 14, Alanís remataba de cabeza ente Álex Pérez, que midió mal el saltu, y Cristian Salvador y consiguía'l segundu pa los azules.

Entrada de Djurdjević

Nun reaicionaría'l Sporting hasta la segunda parte, cola entrada de Djurdjević nel minutu 69, acompañando a Neftali na delantera. El suizu d'orixe angoleñu provocaría un penalti qu'anotaría pel centru Carmona cuando faltaben 17 minutos per delantre pa da-y la vuelta al resultáu.

Sicasí, el Sporting nun acabó de xenerar peligru real a la meta de Champagne, col Uviéu mui seriu atrás. Al final, victoria por 2-1 pa los d'Anquela y allegría nel Carlos Tartiere nuevu por un trunfu nuevu ente l'eternu rival, que queda cuatro puntos per detrás de los azules y más cerca de los puestos de peligru a pesar de siguir decimocuartu.

Aplausos nel primer entrenamientu

La derrota llevó al club roxiblancu a destituyir a Rubén Baraja dos selmanes depués de raticalu nel puestu. El so sustitutu ye José Albertu, qu'ascendiera al Sporting B a Segunda División B y tuviera a puntu d'eliminar a Elche la campaña pasada nes eliminatories d'ascensu a Segunda División A tres finar la temporada en segunda posición.

Anguaño, a pesar de l'amplia renovación que vivió'l filial roxiblanco y un irregular comienzu, ocupa la quintu posición con 23 puntos, los mesmos que'l Mirandés. Iván Hernández y el restu del so cuerpu téunicu acompáñenlu nesta so primer etapa nel fútbol profesional, que comenzó esta tarde ente aplausos.

Contador Estadistiques