Xixón escueye'l representante que sustituya a Moriyón

Tres 8 años de gobiernu municipal de Carmen Moriyón, Xixón afronta esti domingu unes eleiciones de cambiu. L'alcaldesa cumple'l tope que marquen los estatutos del partíu y Foro presenta a Álvaro Muñiz pa tratar de caltener l'alcaldía frente a la favorita según les encuestes, Ana González, candidata pola FSA-PSOE.

La ex conseyera d’Educación, Cultura y Deporte encabeza tolos sondeos espublizaos estos díes en dellos medios de comunicación, ensin mayoría absoluta. Poro, la socialista deberá buscar alcuerdos, previsiblemente colos partíos de la izquierda, anque ensin descartar otres opciones.

L'asturianista Yolanda González Huergo ye la candidata de Podemos Asturies, mentes qu'en Xixón pola Izquierda, coalición d'Izquierda Xunida (IX) y Izquierda Asturiana (IAS), repite Aurelio Martín. Les fuercies de derecha presenten a Muñiz (Foro), a Alberto Manuel López-Asenjo (PP) y a José Carlos Fernández Sarasola (Ciudadanos).

La otra formación asturiana qu'acude a les municipales ye Andecha Astur, con Llucía Fernández Marqués como candidata. Mentes, de calter municipal ye Por Gijón,que debuta nuna cita coles urnes con David Alonso.

Tamién se presenten el Partido Comunista de los Trabajadores de España (PCTE), con Aida Muel como cabezalera; y VOX, con Eladio de la Concha, que completen les diez candidatures qu'opten a l'alcaldía.

Semeya obra de David Álvarez López baxo llicencia CC BY 2.0.