Diez formaciones aspiren a llevar l’alcaldía

Un total de diez partíos presenten candidatura pa les eleiciones a l’alcaldía del 26 de mayu, agora en manes de Foro. La formación conservadora ye la única asturiana xunto con Andecha Astur, la candidatura llocal Por Gijón y Izquierda Asturiana (IAS), ésta en coalición con Izquierda Xunida (IX), mentes que Podemos presenta como cabeza de llista a l’asturianista Yolanda G. Huergo.

Tres cumplir el tope de dos llexislatures que marquen los estatutos de Foro, María del Carmen Moriyón abandona l’alcaldía de Xixón pa pasar a liderar la llista a la Xunta Xeneral. El so sustitutu pa optar a caltener el gobiernu municipal ye Álvaro Muñiz Suárez tres ganar nes primares a Esteban Aparicio, conceyal de Seguridá Ciudadana, Movilidá y Tresportes.

El principal partíu de la oposición, el PSOE, tamién tres primaries, presenta a la ex conseyera d’Educación, Cultura y Deporte como candidata, Ana González, mentes que’l PP, nesti casu por mandáu de Madrid, acude a la cita coles urnes con Alberto Manuel López-Asenjo, que fora secretariu xeneral de Pesca nesta llexislatura baxo'l mandatu de Mariano Rajoy.

Formaciones asturianes

L’asturianista González Huergo encabeza la llista de Podemos-EQUO Xixón, coalición que vien a sustituyir a la candidatura de xunidá popular Xixón Sí Puede. La xurista superó nes primares del partíu a la diputada Rosa María Espiño.

IAS participa na coalición Xixón por la Izquierda xunto con IX, que lleva como númberu 1 a Manuel Aurelio Martín, tamién escoyíu pola militancia. La formación republicana y soberanista lleva a Ernesto Avelino Suárez Sáez nel puestu númberu 7 d’una candidatura que destaca por incluyir numberosos independientes.

La otra formación asturiana que se presenta a les municipales ye Andecha Astur, con Llucía Fernández Marqués como candidata. Nun ye la única llista qu’encabeza, yá que tamién ye candidata nacionalista al Congresu y a la Xunta Xeneral.

Mentes, la gran novedá ye la presentación d’una candidatura de calter municipal: Por Gijón. Ésta ta encabezada pol ex conceyal de Xixón Sí Puede, David Alonso Medina.

Fernández Sarasola tamién repite

Ciudadanos-Partido de la Ciudadanía, el sestu con representación xunto con Foro, PSOE, Xixón Sí Puede, PP, IX y Ciudadanos, repite candidatu. Asina, José Carlos Fernández Sarasola va aspirar per segunda ocasión a l’alcaldía.

El restu de partíos qu’acuden a les urnes el 26 de mayu son el Partido Comunista de los Trabajadores de España (PCTE), con Aida Muel como candidata; y VOX, con Eladio de la Concha.

Semeya obra de DougManson baxo llicencia CC BY-SA 3.0.