El PSOE recupera Xixón

Ana González será la primer edil de Xixón tres ganar les eleiciones con una gran ameyoramientu de resultaos con respeuto a la llista de la FSA-PSOE del 2015 al pasar de 7 a 11 conceyales. Ciudadanos conviértese na segunda fuercia con 4 nuna xornada na que Foro pierde l’alcaldía depués de 8 años con Carmen Moriyón al frente.

El gobiernu municipal torna pa los socialistes, que pueden mirar hacia la izquierda pa buscar alcuerdos con Podemos-EQUO o hacia la derecha, con Ciudadanos. La formación morada nun consiguió caltener los 6 conceyales de Xixón Sí Puede (21,10 por cientu) y tien que conformase con 3 (11,87 por cientu).

La ex conseyera d’Educación, Cultura y Deporte algamó’l 34,21 por cientu de los votos, diez puntos más de lo que sacó'l PSOE hai cuatro años (24,80 por cientu) con José María Pérez López. El líder de la oposición pasa a ser José Carlos Fernández Sarasola, únicu representante de Ciudadanos na Casa Conceyu hasta agora (5,71 por cientu), que consigue 4 (13,39 por cientu) ediles esti 26-M.

Álvaro Muñiz, candidatu de Foro pa sustituyir a Carmen Moriyón, nun tuvo’l tirón que l’agora diputada ente l’electoráu, lo que llevó a esta formación a perder 5 de los sos 8 representantes (25,59 por cientu) y quedar con 3 (12,37). Mesma cantidá tienen Podemos-EQUO y el PP (11,22 por cientu), que caltién la so representación actual (10,75 por cientu).

VOX entra na Casa Conceyu con 2 ediles (7,01 por cientu) na so primer participación nunes municipales en Xixón, mentes que Xixón por la Izquierda, la coalición d’Izquierda Xunida (IX) y Izquierda Asturiana (IAS), algama 1 (6,20 por cientu) y queda a 25 votos de caltener los 2 que tenía IX (8,15 por cientu) a pesar de rexistrar una baxada importante d’apoyos.

El primer grupu estraparllamentariu pasa a ser Por Gijón, que rexistró un 2,38 por cientu del total de votos. Andecha Astur, pela so parte, sumó 295 votos (0,22 por cientu), cifres peores que nel 2015, cuando consiguió 392 (0,28 por cientu).

Na semeya, miembros de la candidatura del PSOE a les eleiciones, con González nel centru.