Xixón entra en riesgu estremu, lo que conlleva más restricciones

Esti domingu van a entrar a valir les restricciones nueves marcaes pol Gobiernu pa tratar de frenar l’espardimientu del coronavirus SARS-CoV-2 nos llugares más afeutaos. Ente ellos ta Xixón, que pasa a tar en nivel 4+, esto ye, en riesgu estremu, lo que conlleva’l zarru perimetral del conceyu, ente otres munches midíes, per 14 díes

Tres 3 xornaes cumpliendo los trés indicadores afitaos por Salú, la conseyería comunicó ayeri al Ayuntamientu que Xixón qu’entra na llista na que yá tán Grau, Avilés, Castrillón, Corvera, Uviéu, Llanes, Cangas del Narcea, Gozón, Noreña y Mieres, que se completa güei con Samartín del Rei Aurelio. La incidencia acumulada a 14 díes ye de 333 (la llende ye 325) y pa mayores de 65 de 359 (195), mentes que la trazibilidá ye menor del 75 por cientu, en concreto, del 55,4 por cientu.

A ellos se suma l’otru requisitu, tar nel nivel 4 según el baremu del Ministeriu de Sanidá. Coles mesmes, dende’l domingu’l conceyu va tar zarráu perimetralmente, a lo qu’hai que sumar el pieslle d’interiores na hostelería y de grandes superficies sacante alimentación; un máximu de 4 persones n’aconceyamientos, qu’en domicilios namái se permite ente convivientes; y prohibición de práutica deportiva en llugares baxo techu, cola esceición de federaos.

Les midíes van tar vixentes hasta’l 6 de febreru, cola posibilidá d’ampliase si la situación nun ameyora.