Salú prorroga les restricciones 14 díes más, hasta'l 6 de marzu

Baxen los contaxos, pero'l descensu de los indicadores nel conceyu ye lentu, polo que s'opta por siguir col zarru perimetral.

Xixón sigue en riesgu estremu, lo que lleva a la Conseyería de Salú a prorrogar per 14 díes les restricciones del nivel d'alerta 4+, vixentes n'otros 9 conceyos. Van caltenese hasta'l 6 de marzu, cola posibilidá de revisar la situación epidemiolóxica nuna selmana.

"Tanto la incidencia acumulada a 14 díes xeneral como la qu'afeuta a les persones mayores de 65 años asitien al conceyu perriba de les llendes definíes pa entrar nel nivel 4+", apunta Salú. Ayeri la incidencia acumulada a 14 díes yera de 322 casos por 100.000 habitantes –primer xornada que se baxa de los 325 cuando ye necesario tar siete siguíes y en tendencia descendente pa salir de dicha alerta nel casu de les poblaciones con más de 30.000 habitantes–, cuando hai dos selmanes, nel momentu de decretase la primer prórroga, yera de 571.

Mentes, la de mayores de 65 años ta anguaño en 263. No que se refiera a los contaxos, la conseyería apuntó que baxó de 50 a 30 diarios, "pero de manera entá mui lenta".

Na semeya, una terraza na avenida de la Constitución, únicu llugar que va poder siguir usando la hostelería les dos selmanes próximes.