Un conciertu de Pauline en la Playa y una charra sobre Urraca l'Asturiana despiden 'Asturianes'

La esposición pue visitase hasta'l llunes 29.

Les actividaes paraleles a la muestra 'Asturianes' instalada na sala 3 del Centru de Cultura Antiguu Institutu, a partir del popular llibru d'Alicia Álvarez con ilustraciones de María Ortiz, asoleyáu por La Fabriquina con edición d'Araz na so versión en llingua asturiana, empresa editora tamién de YeXixón.com, lleguen a la so parte final. Un conciertu y una conferencia son les dos últimes programaes pola Oficina de Normalización Llingüística y la Universidá Popular.

La primer cita va ser mañana a les 19 hores, una actuación de Pauline en la Playa, grupu conformáu pola propia Álvarez y la so hermana Mar. Amás d'interpretar dalgunos temes propios, l'eventu, con accesu llibre hasta completar l'aforu del patiu del Antiguu Institutu, va ser una oportunidá sentir en direuto cantares venceyaos con dalgunos de les venti muyeres o coleutivos qu'apaecen nel llibru como Aida Lafuente o Rosario Acuña, y temes de La Busdonga, Muyeres o de la so banda anterior, Undershakers.

El Foru de Muyeres d'El Llano, mentes, va acoyer l'actividá que va poner el ramu a esta iniciativa. La historiadora Arantza Margolles va dar la conferencia 'Urraca, el misteriu de la bastarda que quixo ser Reina d'Asturies' a les 19 hores nel Centru Municipal Integráu del barriu.