Un alderique sobre la Tertulia Feminista Les Comadres abre les actividaes de 'Asturianes' del mes de xineru

Van tomar parte Begoña Piñero, Pilar Sánchez Vicente y l'autora del llibru sobre'l que xira la esposición del Antiguu Institutu, Alicia Álvarez.

Depués de falar sobre Les Cigarreres y de cocinar les recetes de María Luisa García, agora ye'l turnu d'aldericar sobre la Tertulia Feminista Les Comadres, toes elles protagonistes del llibru 'Asturianes', de La Fabriquina editáu por Araz, empresa editora tamién de YeXixón.com, na so versión en llingua asturiana. La presidenta d'esta asociación y les dos escritores van falar "de feminismos, de comadres, y de felpeyos, de les muyeres d’anguaño y de les que les precedieron, d’esi Tren de la Llibertá qu’arrancó va pa diez años dende Xixón", apunten dende la Fundación Municipal de Cultura, Educación y Universidá Popular.

Tamién va haber tiempu p'alcordances, vindicaciones, lliteratura, historia y otros temes que vayan surdiendo. La cita ye esta tarde, a les 19 hores, nel salón d'actos del Centru de Cultura Antiguu Institutu.

El llunes, mentes, va ser recordada la pintora Julia Alcayde, actu que va servir d'escusa pa falar d'arte. Nesta ocasión la charra va treslladase a la Escuela de Comerciu, a la mesma hora, y va contar cola intervención de Carmen Díaz-Faes.

Hasta'l día 29

La esposición 'Asturianes', que presenta les ilustraciones de María Ortiz y información sobre la ventena de "muyeres y colectivos inspiradores" que recueye Álvarez nel so llibru, amás d'oxetos venceyaos a toes elles, va tar abierta al públicu hasta'l día 29 na sala 3 del Centru de Cultura Antiguu Institutu.

Na imaxe, ilustración d'Ortiz dedicada a la Tertulia Feminista Les Comadres.