Suárez abandona VOX pero va siguir como conceyal non adscritu y al frente de Divertia

Aseguraría la estabilidá del gobiernu municipal col so votu y va siguir presidiendo Divertia.

Depués de desmarcase'l sábadu de la hasta ayeri compañera de partíu Sara Concepción Álvarez Rouco poles decisiones tomaes estos meses, que tuvieron l'españíu naquella rueda de prensa sobre los cambios previstos nel Festival Internacional de Cine de Xixón (FICX), ayeri Óliver Suárez Rubio anunciaba que salía de VOX. Foron munches les crítiques que recibió estos díes y nun comunicáu afirmaba que "sé que nun quieren echame, quieren que me vaya, marcho".

Al empar afirmaba que diga siguir como conceyal non adscritu y que nun diba ser impedimentu pa la estabilidá del gobiernu municipal, agora en solitariu de Foro y PP depués de decidir la salida de VOX del mesmu, y asina "frenar a la izquierda". L'alcaldesa Carmen Moriyón, que nel Plenu d'ayeri aceptaba'l pidimientu del PSOE pa convocar yá una xunta de voceros estraordinaria, programada pa mañana, vio con bonos güeyos el desmarque de Suárez Rubio de la so compañera de partíu y nun ve incompatible la situación con que siga al frente de Divertia.

Na imaxe, Suárez Rubio sal de la sala de plenos nuna posa detrás de la edil de Podemos, Olaya Suárez Fernández.