Moriyón dexa fuera del gobiernu municipal a VOX

“Dende VOX paralizóse conscientemente’l funcionamientu de la organización municipal”, aseguró l’alcaldesa Carmen Moriyón nuna comparecencia d’urxencia p’anunciar que taba “acabante firmar les resoluciones poles que VOX queda fuera del gobiernu llocal”. Una decisión qu’aceleró unes declaraciones de Sara Concepción Álvarez Rouco, hasta agora conceyala de Festexos, sobre’l FICX.

La edil apuntaba esta mañana na rueda de prensa la intención d'abrir la edición del 2024 del Festival Internacional de Cine de Gijón/Xixón (FICX) a otros públicos y nun asegurar la continuidá del premiu Rambal que s'entrega en collaboración con XEGA nin de películes n'asturianu, asina como anunciar la convocatoria d'un gallardón nel marcu del festival que represente los valores que defende'l so partíu, cuestiones que nun consultara col partíu que tien l'Alcaldía. Nun tardaría en reaicionar Moriyón, que na redes social X espublizaba un mensaxe breve y concisu: “acabóse”.

Al empar convocábase una comparecencia pa pela tarde nel Salón de Receiciones del Conceyu pa dar anuncia de la decisión d’espulsar a la ultraderecha del executivu municipal. “El motivu d’esta comparecencia ye anunciar a la ciudá de Xixón, a los xixoneses y a les xixoneses, que, como alcaldesa, toi acabante firmar les resoluciones poles que VOX queda fuera del gobiernu llocal”, arrancó Carmen Moriyón una intervención de poco más de 3 minutos na que nun almitió entrugues.

“Ye una decisión mui meditada y que nun respuende únicamente a les declaraciones que tuvieron llugar esta mañana en rellación al Festival Internacional de Cine de Gijón, declaraciones que per otru llau considero que nun tán al altor d’una ciudá como Xixón y qu’atenten contra la tolerancia que siempre carauterizó y va siguir carauterizando la nuesa ciudá”, especificó darréu la presidenta de Foro Asturias, qu'apuntó que “la realidá ye que, llueu d’estos meses, constatamos que VOX non sólo nun foi quien a exercer les responsabilidaes de gobiernu que nos otorgaron los xixoneses, sinón qu’antepunxeron les sos sigles al interés xeneral de la ciudá. Y mientres sía alcaldesa nun lo voi permitir”.

Previamente Moriyón dixera que “Foro Asturias ye un partíu que cree fondamente na democracia. Por esi motivu entendimos que yeren les urnes les qu’avalaben la entrada de VOX nel equipu de gobiernu, una entrada qu’implicaba una oportunidá pa trabayar por y pa Xixón”.

"Foro nun incumplió pautu nengún"

“Amás de les declaraciones respeuto al Festival de Cine, quiero que se sepa que dende VOX paralizóse conscientemente’l funcionamientu de la organización municipal y foron pasivos dafechu respeuto al primer gran proyeutu conxuntu de cualquier gobiernu, esto ye, les ordenances fiscales. Quiero ser mui firme nesto: Foro Asturias nun incumplió pautu nengún, tolo contrario”, siguó l'alcaldesa.

Por último, Moriyón señaló que “el primer comprimisu adquiríu por esti partíu que tengo l’honor de presidir ye cola ciudadanía d’Asturies y nesti casu concretu, cola de Xixón. Por eso, reitero, mientres yo sía alcaldesa esta ciudá nun va permitir nenguna inxerencia dende Madrid o dende ónde sía”, y garantizó que “Xixón nun esperimentará retrocesu nengún nes sos llibertaes. Esta ciudá ye una ciudá llibre, tolerante y acoyedora. Siempre lo foi y va siguir siéndolo”.

Na semeya, Moriyón acompañada de conceyales de Foro.