L’asturianu ye “una llingua que nun esiste” pal presidente del Divertia, del que piden la so destitución

El conceyal non adscritu Óliver Suárez Rubio y presidente de Divertia afirma nuna entrevista que l’asturianu “ye una llingua que nun esiste”. “Ye inalmisible qu’un cargu públicu faiga declaraciones como éstes”, afirma Iniciativa pol Asturianu, qu’esixe a l’alcaldesa la so destitución.

Foi nel diariu ‘El Comercio’ esti domingu onde l’edil, ex de VOX, fixo esta declaración. A una entruga sobre si diga programar “a artistes que promocionen l’usu del asturianu” respondió que “nun me gustaría que s’utilizaran les actuaciones musicales, por exemplu, pa tratar de promocionar una llingua que nun esiste”.

Tamién faló d’una supuesta “falta d’ufierta” pa xustificar una reducción d’actuaciones venceyaes al asturianu y apunta, sobre si nel so programa tien espaciu eventos n’asturianu, que “trabayaré mano a mano colos programadores de los principales eventos, y daré la mio opinión pero non siempre impondré’l mio criteriu”. Unes declaraciones que nun tardaron en xenerar reaiciones.

Iniciativa pol Asturianu asoleyaba esi mesmu día un comunicáu nel que reclamaba “a Carmen Moriyón la destitución del presidente de Divertia tres negar la esistencia del asturianu”. Pidi a la presidenta de Foro que “esclarie si caltién la confianza nun conceyal negacionista del asturianu que defende acciones discriminatories contra l’usu del idioma”, y demanda al PP, “como sociu del gobiernu local, un posicionamientu claru énte esta discriminación pa col asturianu y los artistes qu’usen esta llingua nes sos creaciones”.

“Ye inalmisible qu’un cargu públicu faiga declaraciones como éstes, yá que suponen l’afitamientu de la discriminación de la ciudadanía falante d’asturianu, asina como un ataque a un patrimoniu cultural protexíu”, considera esta organización que trabaya pola normalización del idioma, que remata afirmando que “la ciudadanía de Xixón nun merez un tratu humildante al so patrimoniu llingüísticu como’l que vienen sintiendo nestos meses caberos per parte de miembros del gobiernu lideráu por Carmen Moriyón”.