Prórroga nueva del zarru perimetral del conceyu: hasta'l 3 d'avientu

Caltiénse tamién hasta esa fecha'l pieslle de la hostelería y del restu de les actividaes comerciales consideraes non esenciales.

El Gobiernu decidió prorrogar 15 díes más, hasta'l 3 d'avientu, el zarru perimetral de Xixón, al igual que'l d'Uviéu y Avilés. Ésti impúxose 24 d'ochobre con una previsión de dos selmanes, ampliándose darréu hasta'l miércoles y prorrogándose otra vuelta con un llargor como'l del primer periodu.

Cuando principió esta restricción la incidencia acumulada en Xixón nos 14 díes previos yera de 353 casos cada 100.000 habitantes, que na primer ampliación yá xubía a los 756,9. Güei ésta ye 836,7, anque les autoridaes sanitaries consideren que la midida aplicada ayudó a torgar un espardimientu mayor del coronavirus SARS-CoV-2.