El zarru perimetral del conceyu allárgase hasta’l 18 de payares

La situación actual de la pandemia de COVID-19 lleva al Gobiernu a ampliar el zarru perimetral de Xixón, que principió’l 24 d’ochobre con una previsión de dos selmanes, hasta’l 18 de payares. A esta midida incoporáronse otre como’l pieslle de les actividaes comerciales non esenciales o’l toque de queda de 22 a 6 hores.

La incidencia acumulada de 756,9 casos de COVID-19 por cada 100.000 habitantes nos 14 díes últimos que tien Xixón, a fecha del llunes, mui superior a la media del país, de 421, convierte al conceyu nel terceru con peores datos del país, namái superáu por Ayande (1.031,6) y Ibias (887,6), de muncha menos población. Cuando se decretó’l zarru yera de 353, un aumentu esmolecedor qu’esplica la situación que se ta viviendo en Cabueñes, a piques del colapsu.

Amás de les midíes qu’entraron en vigor esti miércoles, la ciudadanía va siguir ensin poder salir y entrar del conceyu pa llendar la movilidá y tratar de frenar l’espardimientu del coronavirus SARS-CoV-2. Avilés y Uviéu tamién permanecen pesllaes.

El Gobiernu encamienta tamién a la población autoconfinase y solicita que se respeten franxes horaries pa facilidar l’actividá física y paseos de la población mayor de 65 años, dependientes o individuos con patoloxíes de riesgu. Propón de 9 a 12 y de 15 a 18 hores pa estos coleutivos y de 6 a 9 y de 18 a 22 hores pal restu de ciudadanos.

L’alcaldesa, n’aisllamientu

Ana González Rodríguez, alcaldesa de Xixón, ta n’aisllamientu nel so llar tres tener síntomes compatibles cola COVID-19. Fixo una PCR, na que dio negativo, pero va trabayar dende casa pa completar los diez díes que marca’l protocolu.