L’arranque del Atlético Guardés pesó al Liberbank nuna Copa que viaxó a Elx

Un parcial de 3-0 por parte d’un acertáu Atlético Guardés foi una llosa pal Liberbank, que cayó elimináu en cuartos por un equipu gallegu que caltuvo la ventaya tol partíu y acabó ganando 30-24. La Copa 2021 de Telde foi pal Visitelche.com, que superó na final al Aula Alimentos Valladolid pol resultáu de 32-26.

Con Aida Palicio como’l so meyor recursu, les xugadores de La Calzada trataron de recortar distancia nel marcador, pero l’Atlético Guardés nun dio opción na primer parte y nel tramu final metió l’acelerador pa llegar al descansu con un 16-9. Salió meyor na segunda metá l’equipu de Cristina Cabeza, téunica que va liderar la temporada qu’entra’l proyeutu del Liberbank per segundu añu con una base del equipu actual, pero en nengún momentu punxo en peligru’l trunfu del club d’A Guarda, qu’en semifinales cayó 32-28 col Aula Alimentos.

El títulu, mentes, viaxó a Elx, al ganar a les castellanes 32-26 na final. Ye la primer Copa que lleva’l Club Balonmano Elche, qu’en setiembre quedara subcampeón.

Na imaxe, Palicio llanza dende los 7 metros.