El Liberbank de Cabeza, al segundu asaltu pola Copa

|
Liberbank La Calzada en Telde

Depués de cayer en semifinales na Copa celebrada en setiembre nel entamu de la temporada, magar ser la correspondiente al cursu 2019-2020, el Liberbank de Cristina Cabeza va tratar de repetir una bona actuación nel tornéu del KO. El primer rival va ser esti vienres l'Atlético Guardés nel Pabellón Insular Rita Hernández de Telde.

La victoria na última xornada de Lliga énte'l potente Rincón Fertilidad Málaga (24-23) permite a les de La Calzada, campeones d'esti tornéu nel 2018, viaxar a Gran Canaria con optimismu depués d'una temporada marcada poles lesiones y una fase pol títulu irregular. Pa la cita copera la téunicu madrilana nun va poder contar con Cecilia Cacheda, Laura Rivas y Sabrina Fiore.

El rival, l'Atlético Guardés, ye subcampeón matemáticu de Lliga con namái 4 derrotes en tola temporada y tien na Copa una vía pa desquitase. El partíu va tener llugar mañana, a les 18.30, hora peninsular, y va poder siguise en direuto poles páxines de RTVE y de la Real Federación Española de Balonmano.

El restu de choques enfrenten al Visitelche.com con KH.7 Granollers (13 hores); al Super Amara Bera Bera, yá campeón de Lliga, col Málaga (16 hores); y al llocal Rocasa Gran Canaria col Aula Alimentos de Valladolid (21 hores). L'actual campeón ye'l Málaga, qu'actuó como anfitrión na final de setiembre col Elche (24-20).

Na imaxe, bon ambiente de les xugadores del Liberbank nel entrenamientu na cancha del Rocasa previa al partíu de mañana de cuartos de final. Semeya propiedá del Club Balonmano La Calzada.

Contador Estadistiques