La Universidá Popular da continuidá al cursu de Llingua Asturiana con un nivel avanzáu

Yá ta abierta la matrícula pa los cursos d’iviernu de la Universidá Popular, qu’ufre 139 alternatives de diferentes temátiques, toes presenciales. Va dase continuidá esti cuatrimestre al de Llingua Asturiana que se desenvolvió na seronda col entamu, depués de dellos años, d’un nivel avanzáu, pal que queda namás una plaza llibre.

‘Llingua asturiana: avanzáu’ sigue nel Centru Municipal Integráu de L’Arena, tamién los llunes y miércoles, anque adelanta l’horariu en dos hores. Agora va ser de 17 a 18.30 hores.

Les clases van arrancar el 14 de febreru y van allargase per 40 hores nes que les alumnes y alumnos van recibir ferramientes gramaticales, vocabulariu, ortografía, exercicios pa trabayar la oralidá, sociollingüística y conteníos culturales complementarios, siendo necesario tener conocimientos previos d’asturianu dau’l nivel. En concreto, los temes a tratar son los siguientes: Lleiciones avanzaes de gramática, Normes ortográfiques, Historia de la llingua asturiana, Variedaes internes del asturianu, Usu oral del asturianu, Lliteratura asturiana, Llectura de llibru, Sociollingüística II y Vocabulariu II.

Namái queda una plaza pa completar les 16 que s’ufren pa esti cursu, que tien un costu de 40 euros. La matrícula pue formalizase hasta’l 2 de febreru de manera presencial cola tarxeta ciudadana nes oficines d’atención a la ciudadanía –con cita previa–, en caxeros ciudadanos, Internet o l’aplicación pa móvil ‘Gijón’.

Aumentu de la ufierta

Esti cuatrimestre de la Universidá Popular presenta un total de 139 opciones, 8 más que na seronda, y 1.848 places, lo que supón un aumentu de 131. Les clases pónense en 16 centros de la villa y abarquen temes tan diferentes como arte, historia y patrimoniu; ciencia; gastronomía; música; teatru y danza; artesanía; llingües y lliteratura; o informática, Internet y móviles, ente otres.