La Guía de Programes Educativos de Xixón presenta doce propuestes en llingua asturiana

|
Xixónpolis

La Fundación de Cultura, Educación y Universidá Popular, dende'l departamentu d'Educación, recupera la Guía de Programes Educativos de Xixón esti cursu depués del parón del pasáu poles circunstancies de la pandemia. Na estaya de Llingua Asturiana ufre a les escueles doce propuestes d’Infantil a Bachilleratu.

Esti guía recueye tola ufierta d’actividaes educatives que los diferentes servicios dependientes del Conceyu presenten a los centros. Son 278 de campos como la música, el teatru, el patrimoniu cultural, l’arquiteutura, les nueves teunoloxíes, el diseñu, la ciencia o la igualdá, ente otros munchos.

Tamién ta incluyíu un Programa d’Espardimientu y Normalización del Asturianu con 12 propuestes pa toles edaes. Pa Infantil ta ‘El xuegu de les pareyes’ y ‘¡De la panoya al platu!’, mentes que pa Primaria preséntase ‘Cantar presta muncho’; ‘¡Qué cuentu tienes!’, colos llibros ‘Falar ensin parar’, ‘Pulgarina’, ‘Nun-yos tengas perceguera 2’ y ‘La curuxa Catuxa’; ‘Danciando tol añu’; ‘Xixón, una ciudá abierta a la mar’; y ‘Xixónpolis: el xuegu pa mercar Xixón’.

Les visites guiaes a la Oficina de Normalización Llingüística, ‘¡Saca la llingua! Alcuentros de la mocedá cola llingua’, ‘Lo elemental de los elementos: xugando cola tabla periódica’ son les propuestes pa Secundaria. Mentes, ocupen delles etapes educatives la esposición ‘Margarita Salas. Una muyer con ciencia’ y el Premiu Fierro Botas a la Meyor Idea Normalizadora.

Na imaxe, escolinos xueguen a Xixónpolis. Semeya propiedá de la Oficina de Normalización Llingüística de Xixón.

Contador Estadistiques