El Molinón

El Molinón

L’Estadiu Municipal El Molinón-Enrique Castro Quini, como se noma anguaño tres la muerte nel 2018 del históricu delanteru, ye’l campu más antiguu del fútbol profesional estatal. Cola so última reforma fecha nel 2008, nel que se llevantó la grada del fondu norte pa igualala al sur y aumentar l’aforu, amenorgáu tres la normativa de la FIFA de facer tol campu sentáu nel añu 97, cuenta con una capaciá de cuasi 30.000 espectadores.

El primer partíu del que se tien constancia que se xugó nesti terrén asitiáu cerca a un gran molín hidráulicu que-y dio nome ye del 17 de mayu del 1908. El diariu ‘El Comercio’ fai una reseña el miércoles 20 de mayu d’un partíu xugáu’l domingu nesi prau por La Bella Sportiva y El Balón que finó con victoria del primeru por 1-0.

El Sporting, fundáu nel 1905, nun xugaría n’El Molinón como llocal hacia l’añu 1913, adquiriéndolu poco depués. Nel 1917 viviría una importante remodelación, lo que-y permitió ser nel 1920 escenariu de la final de Copa ente’l Barcelona y l’Athletic Club (2-0).

El primer partíu internacional foi nel 1928, un España-Italia (1-1), acoyendo munchos más a lo llargo de la historia. Nesi sen, hai que destacar que’l campu foi sede del Mundial del 82, acoyendo los trés partíos d’Alemania Federal contra Arxelia (1-2), Chile (4-1) y Austria (1-0).

A lo llargo de los años El Molinón vivió delles remodelaciones y inclusive una quema nel 1931 que destruyó gran parte de la tribuna principal. Les necesidaes del Sporting llevaron a vender el campu al Ayuntamientu nel 1944, anque’l club siempre foi’l so únicu usuariu.

Ente los récores del campu xixonés ta’l fechu de ser el primeru del Estáu en tar atecháu enteru, nel 1969, y n’acoyer un alcuentru televisáu de Segunda, un Sporting-Osasuna (3-0) nel 1970. Tres la reforma pal Mundial El Molinón l’aforu medró hasta los 42.000 espectadores, enllenándos pa los partíos mundialistes y pa la promoción col Lleida de la temporada 94-95 (3-2 tres el 2-2 de la ida), pero cola obligación de tener sólo asientos quedó reducíu a 25.000 hasta les últimes obres.

Amás de p’acoyer inolvidables partíos de fútbol, la instalación xixonesa sirvió tamién pa ser sede grandes conciertos. Miguel Ríos, Tina Turner, The Rolling Stones, Bruce Springsteen o Paul McCartney tuvieron el privilexu de tocar n’El Molinón.

Contador Estadistiques