La fiesta del fútbol xixonés na Copa, con precios populares

|
Cartelu entraes UC Ceares-Sporting Copa

L’UC Ceares y el Sporting quieron convertir el partíu de Copa d’El Molinón, programáu pal martes 30 a les 20 hores, nuna gran fiesta del fútbol xixonés. Pa ello el club de Ciares pon precios populares, calteniendo los 15 euros de públicu y ufriendo entraes a 10 a los socios roxiblancos y a los de tolos clubes deportivos del conceyu.

Cuando queda una selmana pa l’históricu duelu xixonés na competición, primer enfrentamientu entrambos de calter oficial, yá se conocen los precios pal partíu. Los socios de la entidá que fai nesta ocasión de llocal van tener qu’abonar 5 euros, cola posibilidá de sacar entraes d’acompañante, ensin llende, a 10 euros.

La intención, sacante una gran demanda, ye la d’abrir namái la Tribunona, acotando un sector pa estos aficionaos, que van poder mercar les entraes dende mañana en La Santina de Ceares, nel Yáskaru, nel Café de Lola o nel chigre del campu de Lloreda. Nel restu de la grada oeste colocáranse’l restu d’aficionaos qu’acudan al partíu.

El preciu pa los socios del Sporting va ser de 10 euros, con tickets tamién a la venta dende mañana n’El Molinón n’horariu de 10 a 13.30 y de 17 a 20 hores. El sábadu, día de partíu (Sporting-Fuenlabrada, 18.15 hores), van poder mercase de 11 hasta la hora d’entamu del choque, tando namái pesllada la taquilla’l domingu.

Socios del restu de clubes deportivos de Xixón van poder acceder al campu pol preciu de 10 euros, pa lo qu’han de comprar la entrada n’El Molinón. El restu de públicu ha d’abonar 15 euros, con tickets a la venta nel estadiu y na boutique del Sporting, mentes que los menores de 16 años tienen pasu llibre previa retirada d’invitación nos puntos enantes citaos dependiendo de si quier tener asientu nel sector del Ciares o nel del club roxiblancu.

Contador Estadistiques