Monolitu del Mundial 82

El Molinón foi sede mundialista nel añu 1982. El centenariu campu xixonés acoyó los trés partíos d’Alemaña Federal frente a Arxelia (1-2), Chile (4-1) y Austria (1-0), choque que pasó a la historia de la Copa del Mundu pola poca gana d’atacar de los dos equipos con un resultáu que daba’l pasu a los dos europeos y dexaba fuera a los africanos, una situación que llevó a la FIFA a poner horariu unificáu dende México 86 na xornada última de la fase de grupos.

Un monolitu recuerda esti eventu históricu nel parque Isabel la Católica, mirando al aparcamientu d’El Molinón, pero pasa desapercibíu pa munchos visitantes. Consta de dos plaques de bronce, na superior col lema ‘1982 Mundial de Fútbol’ y nel inferior colos nomes y firmes de los futbolistes de los cuatro seleiciones que conformaron el grupu 2, con partíos tamién nel desapaecíu Carlos Tartiere d’Uviéu.

Los futboleros van poder atopar ellí l’autógrafu de xugadores como l’alemán Lothar Matthäus, que debutara nun Mundial n’El Molinón con 21 años, el porteru Schumacher, Ulie Stielike o Rummenigge; los austriacos Obermayer, Prohaska o Welzl; los chilenos Figueroa o Caszely; y los arxelinos Fergani o Belloumi. Na seleición africana apaez un Zidane, Djamel, del que se llegó a dicir que yera tíu de la estrella mundial francesa d’ascendencia arxelina Zinedine, pero’l campeón del Mundu del 98 negó cualquier parentescu.