Duelu xixonés en Copa: l’UC Ceares va debutar na competición col Sporting

El sortéu de la primer ronda de Copa quixo dar un rival especial al UC Ceares na so histórica primera participación nel tornéu, con mui pequeñes opciones de recibir a un Primera y mayores de cruciase con un Segunda. El caprichu del destín quixo que fora’l Sporting, nun duelu llocal que se xugará previsiblemente n’El Molinón.

Un ex roxiblancu, Miguel de las Cuevas, agora nel Córdoba, encargóse de sacar les boles correspondientes a los equipos de Segunda RFEF. Les dos primeres, les del Panadería Pulido San Mateo y la Gimnástica Segoviana, dieron el premiu a canarios y segovianos de recibir a la Real Sociedad y al Mallorca, los dos equipos de Primera que quedaben llibres, y la sesta, la del UC Ciares.

Nel otru llau del escenariu asitiáu na Ciudad de Fútbol de Las Rozas, Odei Onaindia, capitán del Mirandás, garraba una bola azul qu’identificaba a los de Segunda, abríala y lleía “Sporting de Gijón”. Ciares-Sporting, un duelu inéditu en competición oficial que va convertir esta primer ronda de la Copa nuna gran fiesta del fútbol xixonés con El Molinón, sacante sorpresa mayúscula, como sede.

La Cruz nun cumple les condiciones pa recibir a un equipu de LaLiga pola normativa de la competición, tanto poles midíes del prau como pola falta de lluz pa la televisión, y el club del sur de la villa contaba col ofrecimientu del Conceyu pa usar El Molinón. D’esta forma, la selmana del 1 d’avientu el Ciares xugará como llocal nel centenariu campu xixonés, asegurándose una gran recaudación que pocos rivales-y podíen ufrir.

La eliminatoria va xugase a partíu únicu y, nel casu de pasar, los de Pablo Busto recibiríen un Primera División. Pela so parte, los de David Gallego tendríen como rival un Primera RFEF o un Segunda División.

Otros equipos asturianos

Los otros dos equipos asturianos na competición, l’Uviéu y el Llanera, van enfrentase al Andratx y a la UD Logroñés. Los azules van viaxar a Illes Balears, mentes que los arlequinaos van xugar nel Pepe Quimarán.

El Nalón clasificara pa la eliminatoria previa, celebrada ayeri, pero cayó nos penaltis col Solares cántabru depués de finar 1-1 el tiempu reglamentariu y la prórroga.

Na imaxe, De las Cuevas col papel del UC Ceares.