L-R va dar un conciertu enmarcáu nes actividaes pol Día de los Museos

Esti miércoles, 18 de mayu, celébrase’l Día Internacional de los Museos, con visites comentaes, talleres, aiciones participatives o conciertos hasta’l domingu hasta sumar 32 actividaes. Ente elles rescampla l’actuación de L-R, el dúu formáu por Leticia Baselgas y Rubén Bada, el domingu frente a la Casa Natal de Xovellanos.

‘El poder de los museos’ ye’l lema d’esta celebración entamada pol Conseyu Internacional de Museos (ICOM, poles sos sigles n’inglés) pa sensibilizar a la ciudadanía de la importancia que tienen estes instalaciones pa “l’arriquecimientu de cultures, l’avance del entendimientu mutuu, la cooperación y la paz ente los pueblos”. Esti añu pretende esplorar el potencial de los museos pa provocar un cambiu positivu nes sos comunidaes al traviés de trés lentes: el poder d’algamar la sostenibilidá, el poder de la innovación na dixitalización y l’accesibilidá, y el poder de la construcción de la comunidá per aciu de la educación.

Xixón incorpórase un añu más a esta cita con una programación d’actividaes dende güei hasta’l domingu. En total son 32 con 87 sesiones nel Parque Arqueolóxicu-Natural de la Campa Torres, les Termes Romanes, la Villa Romana de Veranes, el Piñole, el Muséu del Ferrocarril, la Ciudadela de Celestinos Solar, el Muséu del Pueblu d’Asturies, l’Evaristo Valle y el Muséu Casa Natal de Xovellanos.

Frente a ésti últimu, en Cimavilla, va actuar el domingu, a les 13 hores, L-R, que ta inmersu nuna xira, la ‘N.O.S. 2022’, que va llevalu a Francia, Éire y dellos puntos del Estáu, con presencia en festivales de la repercusión del Interceltique de Lorient o’l BBK Live. La de Xixón va ser una de les poques opciones que va haber pa ver a Baselgas y Bada col so proyeutu post-folk n’Asturies esti añu.