Italia va ser el primer destín del Motive.co La Calzada n'Europa

Les de Cristina Cabeza van enfrentase col Ali-Best Espresso Mestrino na EHF European Cup.

Güei celebróse'l sortéu de la primer eliminatoria de la segunda competición continental, a la qu'accede'l Motive.co Club Balonmano La Calzada al clasificar en cuartu posición. Con 59 equipos inscritos, en realidá va xugase la segunda ronda, de la que llibren 5 conxuntos, ente ellos l'Atlético Guardés.

La ida va tener llugar el 8 o 9 d'ochobre en Mestrin, población de 11.000 habitantes del Vèneto. La vuelta va ser en Xixón, nel Palaciu, la selmana siguiente.

El conxuntu italianu yá disputara esta competición, na que debuten les xixoneses, la temporada pasada. Nun pasaría de la primer eliminatoria al perder col DHC Slavia Praha checu, que cayería na siguiente ronda, por 23-28 y 26-21.