Cimavilla n’ochobre del 34

Cimavilla n’ochobre del 34

Laurentino Nicieza Ovies ‘Noti’ escribió nel 1981 el llibru ‘Cimavilla, Retrablu el mar y su xente marinera’. Nella toca dellos temes en rellatos breves, que llaba mareaxes, dedicando ún, ‘Metralla en el ‘Rriona’’, a cómo se vivió ehí la Revolución d’Ochobre del 34.

Asina, apunta qu’en “aquellos primeros días de octubre del treinta y cuatro” el barriu pasó pol “mayor ‘enyortazu’” que recuerda. “Entre la xente mayor había ‘rocea’, entre la mocedá ‘uforia’ y ‘afegadín’, en toa la ‘reciella curiosidá’, tó era un gran ‘embayu’”, esplica al tiempu que rellata como’l cruceru Libertad taba na bahía “tou ‘llargu, con los cañones preparaos apuntando a Cimavilla, que era de él el ‘blancu’”.

“Hacíasenos llarga la noche, esperando el día pa saltar de la cama como un volador, correr por les calles, subir a la Talaya pa ver el ‘barcu guerra’ desde el ‘apagador’”, sigue, faciendo referencia tamién “a los fumos de los tiros que tiraben desde los teyaos de la Telefónica, con los de la calle Asturias, desde el de la ‘casona’”. Barricaes nes entraes del barriu, xergones pidíos a los vecinos “pa poder ‘parapetase’”…, munchu movimientu, que llevaron al Libertad a disparar “‘obuses y granaes rompedores’, disparaes “al ‘devalu’, pero tiraben de verdá y a dar”, provocando una muerte “en casa de Cortés” de la que l’autor foi testigu.

“Van desfacemos Cimavilla”, dicíen les muyeres tres ver los daños nel barriu. Tres rellatar la muerte de “el valiente de José”, cuando decidió tirar pal Ayuntamientu, “cosíu a tiros” pola Guardia Municipal, “porque él, a su manera, defendía la ‘libertá’”, y los ataques nuevos del Libertad, “corrieron la voz de que diben arrasar el barriu si no se rendía, les tropes del general Ochoa veníen a tomar Xixón, trayendo cañones, morteros y fusilería. Que en toa España era la Cuenca Minera la que resistía, pues les demás provincies ‘pegaron el embarcazu’ y de la revolución ná se sabía”.

Sábanes blanques escolingáronse de les ventanes y pañuelos del mesmu color yeren ximielgaos poles persones que baxaben del barriu. “Los guardias, pistola en mano, obligaben a los hombres a defacer les ‘barricaes’, y llevar los ‘fatos’ pa debaxo los soportales”, llegando a disparar a vecinos como Luis el Tara: “¡madre mía!, aquello era peor que los ‘barcos’”.

Palices a los que nun ser queríen chivar, revisión de manes por si había restos de pólvora… “Sólo a los vieyos, a los neños y a les madres, dexábenlos seguir ‘avante’, caíate la ‘pixa’ al suelu al no ver contigo a tú padre”, apunta l’autor, que recuerda “aquel guardia que nos dicía: ¡Ahora vais a saber lo que ye ‘tomate’!”.

“Portóse bien la xente de ‘baxovilla, recogiéndonos en su cases como si fuéramos de familia, lo que Cimavilla entera agradeció toa la vida”, apunta. Cuando tornó al so llar “encontrámosla toa ‘revolvía’, los guardias buscaben armes y xente escondía”.

Semeya de Constantino Suárez, barricaes en Xixón en ochobre del 34.

NOTA: la trescripción del llibru ye lliteral.

Contador Estadistiques