El TSXA anula la ordenanza de movilidá y los coches ensin etiqueta podrán aparcar na ORA

Los recursos presentaos por Foro y el PP contra la ordenanza de movilidá foron estimaos en parte pol Tribunal Superior de Xusticia d’Asturies (TSXA), que l’anula pola falta de memoria económica. D’esta forma, los vehículos ensin etiqueta ambiental podrán aparcar na zona ORA un añu depués de qu'entrara a valir esta prohibición.

La Ordenanza de Movilidá Sostenible del PSOE y Xixón pela Izquierda (IX-IAS) aprobóse en marzu del 2021 col sofitu de Podemos y Ciudadanos y la oposición del restu de grupos. La primer midida polémica del mesmu yera que, cola entrada del 2022, los coches que nun tuvieran pegatina ambiental nun podríen aparcar en zona ORA nos horarios de funcionamientu, anque sí n’aparcamientos privaos y circular pel centru, dalgo que tamién tendríen prohibío dende’l 2026.

Les dos formaciones de la derecha anunciaran nel so momentu recursos que’l TSXA estima agora, anque’l Conceyu va poder recurrir la decisión énte’l Tribunal Supremu. L’edil de Mediu Ambiente y Movilidá, Aurelio Martín, va estudiar mañana colos servicios xurídicos municipales la situación.