El Plenu aprueba la Ordenanza de Movilidá Sostenible que va sacar del centru a los vehículos más contaminantes

|
Movilidá Xixón Ramón y Cajal

El PSOE y Xixón pela Izquierda (IX-IAS) sacaron alantre, col apoyu de Podemos-EQUO y Ciudadanos, la Ordenanza de Movilidá Sostenible. Ta compuesta por 158 artículos qu’afiten la prohibición p’aparcar en zones ORA a los vehículos sin pegatina ambiental dende’l 1 de xineru del 2022 y una llende a la so circulación a partir del 2026.

Cola oposición frontal del PP, Foro –qu’anunció que va llevala a los tribunales– y VOX, y munchu alderique na cai, esta normativa sustitúi a la vixente, del 2002, y tien como oxetivu “el desarrollu sostenible, la llucha contra’l cambiu climáticu y el desendolcu de l’Axenda 20/30”, amás d’una reducción de “la contaminación acústica”. La principal polémica ta na limitación de circulación a parte del parque móvil, en concreto aquellos que nun tienen derechu a les pegatines medioambientales de la Direición Xeneral de Tráficu.

A elles pueden acceder los vehículos nuevos, los de gasolina matriculaos del añu 2000 p’alantre y los diésel a partir del 2006. Los restantes nun van poder aparcar en zona ORA dende’l 1 de xineru del 2022 y, nel 2026, namái tendrán derechu a circular 2.500 quilómetros al añu, distancia a comprobar cola ITV.

Otres midíes qu’afita la ordenanza, aprobada por por 19 votos a favor y 8 en contra, ye la llende de velocidá en 30 quilómetros per hora en víes d’ún únicu carril, la creación de caminos escolares seguros y la preferencia siempre pal peatón y la bicicleta. Son finalmente un total de 158 artículos tres la incorporación de 116 enmiendes.

Contador Estadistiques