El Conceyu aprueba en Plenu retirar los recursos a les sentencies sobre la ordenanza de movilidá

La oposición votó en contra d'esti movimientu qu'anula la norma qu'impedía aparcar en zona azul a coches ensin etiqueta ambiental.

Los votos de Foro, PP y VOX, los trés partíos que conformen l'equipu de gobiernu, permitieron aprobar en Plenu la retirada de los dos recursos de casación énte'l Tribunal Supremu a les dos sentencies de la Sala de lo Contencioso-Alministrativo del Tribunal Superior de Xusticia d'Asturies (TSXA), que daben la razón a Foro y al popular Pablo González, que presentara l'executivu anterior. Na práutica supón la so anulación, que se fadrá efeutiva al final del branu, polo que va quedar vixente l'anterior, del 2002.

La Ordenanza de Movilidá Sostenible del PSOE y Xixón pela Izquierda (IX-IAS) aprobóse en marzu del 2021 col sofitu de Podemos y Ciudadanos y la oposición del restu de grupos. Ente les midíes yá en marcha taba la prohibición p'aparcar en zona azul, activa dende'l 2022, a los coches que, pola so antigüedá, nun tuvieren derechu a la etiqueta ambiental de la Direición Xeneral de Tráficu (DXT).

Cola anulación, estos conductores yá van poder estacionar na totalidá de la villa, anque dende'l cambiu de gobiernu yá pue facese na práutica, yá que nun se multa por ello.Tolos partíos de la izquierda coincidieron en señalar la decisión de retirar los recursos como un atrasu y el PSOE alvirtió de la posibilidá a fondos europeos en materia de movilidá.