El Telecable yá tien tamién la Intercontinental

Yera’l títulu que faltaba y yá vuela pa Xixón. El Telecable Solimar derrotó na tanda de penaltis al conxuntu catalán Generali Palau de Plegamans y proclamóse n’Arxentina vencedor de la Intercontinental de ḥoquei patinos femenín, completando asina un añu y mediu d’escándalu al ganar nes cinco competiciones, la Supercopa en dos ocasiones.

El meyor equipu d’Europa y Suramérica ye de La Calzada. Supercopa, WSE Champions League, Copa, OK Lliga, otra vez Supercopa y Intercontinental son los títulos qu’enllazaron les xugadores xixoneses, un fitu históricu ensin precedente nesta disciplina deportiva.

Fixéronlo les de Natasha Lee, agora al frente del cuerpu téunicu, na población arxentina de San Juan, onde n’avientu del 2018 el Concepción llocal arrampuñó-yos el suañu, y depués de dexar pel camín el vienres a otru equipu de la provincia, l’Aberastain, por 4-0, y ganar al otru européu, el Palau, que superara 3-2 al Andes Talleres, na final. Foi nun partíu de categoría, que finó 3-3 nel tiempu reglamentariu y que tuvo que decidise a los penaltis depués de nun haber goles na prórroga.

Adelantó al Telecable Marta Piquero, empataría a los 3 minutos Aina Florenza y Nuria Almeida daría ventaya al descansu a les xixoneses. Florenza igualaría otra vegada, pero al instante Ana Catarina daba esperanza al cuadru de La Calzada hasta qu’una vieya conocida, Anna Casarramona, obligaba a dir al tiempu adicional.

Nun entamaría bien la tanda de penaltis, con ventaya gracies a Florenza pal Palau, pero un gol clave de Nuria Almeida llueu d’un fallu de Casarroma, a lo que siguió una parada de Fernanda Hidaglo a Busquets dio la oportunidá de sentenciar a Almeida. La portuguesa nun falló y daba la Intercontinental al Telecable.

Títulu númberu 18

Ésti ye’l decimoctavu títulu oficial que gana’l Telecable, qu’acumula 6 copes d’Europa, 4 lligues, 5 copes y 2 supercopes. L’afición yá espera la llegada mañana de les xugadores y cuerpu téunicu pa celebrar l’Intercontinental peles cais de Xixón.

Na imaxe, Piquero y Almeida celebren un gol na final. Semeya de la Real Federación Española de Patinaje.