El Telecable quier completar la so fazaña cola Intercontinental

Depués de ganar los cinco títulos últimos en xuegu nel ḥoquei patinos femenín estatal (Supercopa, WSE Champions League, Copa, OK Lliga y otra vez Supercopa), el Telecable ta n’Arxentina pa llevar el que-y falta: la Intercontinental. El so rival en semifinales va ser l’anfitrión Aberastain.

Foi n'avientu del 2018 la primer y única vez que se xugó la Intercontinental femenina, cuando’l Telecable Solimar cayía col entós anfitrión Concepción, tamién de San Juan, que repite como sede, por 4-2. Enantes les xixoneses derrotaben al Andes Talleres de Godoy Cruz en semifinales por 4-3.

Nesta ocasión el rival ye otru equipu de la provincia, l’Aberastain, subcampeón de Suramérica. Un conxuntu reforzáu cola ex xugadora del Telecable, Milagros Carrera, y la portera internacional arxentina Anabela Flores, que va contar col sofitu de miles d’aficionaos nel pabellón Aldo Cantoni, con un aforu de 8.000 espectadores.

La cita va ser güei a les 19, hora llocal, les 23 n’Asturies, un partíu que va poder siguise en direuto pela canal A8 de TPA. La otra eliminatoria enfrenta mañana al campeón continental llocal, l’Andes Talleres, col Generali Palau de Plegamans, cola final prevista pal domingu 18.30 (22.30 hores).

Al empar celébrase la Intercontinental masculina, colos enfrentamientos Porto-Club Lomas de Rivadavia y Unión Vecina Trinidad-Barcelona.

Sofitu al club

El Telecable, que llegó’l llunes a Buenos Aires y celebró dos amistosos estos díes n’Arxentina, tien a la venta entraes virtuales a 5 euros pa sofitar al club y a les xugadores, y que permite acceder al sortéu de dellos regalos. Pa más información y merca de les mesmes, has calcar nesti enllaz.

Na semeya, les xugadores y cuerpu téunicu del Telecable visitaron a emigrantes asturianos de la residencia del Club Tinetense de Buenos Aires.