La Plaza Mayor acueye una celebración nueva pola Intercontinental del Telecable Solimar

Yá se conoz la hora de la receición oficial a les campeones n'Arxentina, que van dedicar unes pallabres dende'l balcón de la Casa Conceyu.

La entrenadora Natasha Lee, les sos xugadores, restu de cuerpu téunicu y direutiva del Solimar de ḥoquei patinos femenín, Telecable por cuestiones de patrociniu, va llegar sobre les 18 hores n'autobus a la Plaza Mayor dende La Calzada. Ellí van ser recibíes pola corporación municipal pol so trunfu na Intercontinental el domingu pasáu.

Depués van salir al balcón de la Casa Conceyu pa mostrar la copa a los aficionaos y dicir unes pallabres. Un reconocimientu de la ciudá al meyor club de Xixón, con 18 títulos acumulaos, de los que 6 son los últimos puestos en xuegu na so disciplina deportiva.

Derrota en Fraga

No deportivo, el Telecable volvió a la competición doméstica con una derrota col conxuntu revelación de la OK Lliga. Les xixoneses acusaron l'esfuerciu y el viaxe dende Arxentina, asina como'l desplazamientu hasta Aragón, na llende con Catalunya, y cayeron por 4-2 col Esneca Fraga.

D'esta forma, el conxuntu aragonés supera al asturianu na tabla, agora cuartu con 37 puntos polos 39 del so rival el sábadu. El Generali Palau de Plegamans, al que'l Telecable derrotó n'Arxentina na final de la Intercontinental, va primeru con 43 puntos, mentes que'l Vila-Sana Coop d'Ivars, que visita Mata-Xove'l sábadu a les 19.15 hores, ye segundu con 40.

Na semeya, la capitana Sara Lolo sostién la Intercontinental xunto a xugadores y teúniques del Telecable nel recibimientu del martes pasáu nel parking de Mata-Xove a la llegada d'Arxentina. Semeya propiedá del Conceyu de Xixón.