Xixón celebró’l Día Internacional de la Llingua Materna falando de too n’asturianu

El sábadu, na xornada previa del Día de la Llingua Materna (21-F), la Oficina de Normalización Llingüística entamó’l III ‘Xixón Fala en 3’, concursu nel que los participantes faen presentaciones de 3 minutos sobre cualquier tema n’asturianu. Arantza Margolles, Xandru Armesto y Alma Hidalgo foron los ganadores.

La situación pola pandemia de COVID-19 namái permitió l’asistencia’l sábadu al Centru de Cultura Antiguu Institutu d’un grupu pequeñu de públicu, escosándose toles butaques disponibles, pero’l concursu pudo siguise en direuto per Internet en tol mundu gracies a la emisión preparada por Javier Lueje. Ún a ún los participantes defendieron nel escenariu los sos temes sobre cuestiones mui variaes, siempre en llingua asturiana, yá que l’oxetivu del concursu ye fomentar l’emplegu del idioma nun rexistru cultu pa falar de cualesquier cosa.

El xuráu, formáu pol direutor xeneral de Política Llingüística, Antón García; el conceyal d’Educación y Cultura, Alberto Ferrao; el direutor de la Fundación Municipa de Cultura, Educación y Universidá Popular, Miguel Barrero; Marta Mori; Cristina Valdés; y la responsable del SNL xixonés, María Xosé Rodríguez López, aldericó darréu, mientres una actuación sorpresa de Maxi Rodríguez, pa decidir los ganadores en cada estaya, asina como’l segundu y tercer premiu. La recompensa, 600, 275 y 125 euros pa cáun, de manera respeutiva.

Na categoría A, la que correspuende a la cultura y realidá asturiana, trunfó Margolles gracies a la intervención ‘Superstición y malos vezos relixosos. La Inquisición n’Asturies nel casu de Pedro Alonso’. El segundu puesto foi pa Xulián Suárez Flórez con ‘El cancioneru de Martínez Torner’ y el terceru, pa Sergio Buelga por ‘Ambientes y temes del teatru popular asturianu’.

La intervención más valorada na B, la de divulgación, resultó la de Xandru Armesto, qu’espuso’l tema ‘Actuaciones educatives d’éxitu’. Tamién rescamplaron Claudia Gutiérrez Lueje, segunda, con ‘El vexetarianismu, una opción ecolóxica’, y Iván Llera, terceru, con ‘La midición de les audiencies de televisión n’Asturies’.

Ente los participantes mozos, d’ente 14 y 18 años, el xuráu escoyó como la meyor la intervención ‘Lorca, sangre asturiana’ d’Alma Hidalgo. Segunda foi Llara Vega con ‘La música folk n’Asturies, un xéneru con historia’ y terceru, Álvaro Morais con ‘L’orixe de la minería n’Asturies’.

Na semeya, Armesto recibe'l premiu ente Mori y Ferrao.