El Conceyu retira’l moblame urbanu del cascayu pa dexar pasu a los coches

La sentencia favoratible a la plataforma Stop Muro, que demandaba’l doble sentíu n’El Muro, obliga a la retirada del moblame urbanu del nomáu cascayu pa dexar pasu a los coches. Esti llunes entamaron los trabayos cola instalación del cabliáu pa la rede semafórica nueva.

En quinces díes ta previsto que finen los trabayos sobre esta actuación provisional fecha pol Conceyu al final del confinamientu del 2020 pola COVID-19 pa dar más espaciu a los peatones y les bicicletes, que siguía funcionando. La sentencia dictada pol Xulgáu de lo Contenciosu Númberu 1 a favor de Stop Muro obliga a recuperar el sentíu de los vehículos en direición a El Náutico, polo que la calzada onde ta’l cascayu, que nun va perder la pintura actual, va tar disponible namái pa vehículos, sacante la zona verde, el vieyu carril-bici, que va siguir siendo peatonal.

El pasu actual de bicicletes caltiénse, lo qu’obliga a instalar semáforos al cruciase en dellos puntos cola carretera pa vehículos, amás d’en Menéndez Pelayo pa que se pueda facer el xiru a la izquierda. La so preparación, como la cimentación y el cabliáu, son les primeres actuaciones de cara a retirar el moblame urbanu y readaptar tola zona al tráficu.

Na semeya, persones pasien pel cascayu, que va recuperar el tráficu en direición a El Náutico.