L’anteproyeutu de reforma d’El Muro enllena de verde’l paséu

Zones verdes, espacios estanciales y prioridá pa la movilidá activa. Son les carauterístiques principales d'un anteproyeutu de reforma d’El Muro que da protagonismu al peatón, con un camín con vexetación paralelu al paséu y aceres más anches, y que plantega una plataforma única y un carril con sentíu únicu que sirva de vía de serviciu.

El conceyal d’Obres Públiques y Proyeutos de Ciudá, Olmo Ron, y el de Mediu Ambiente y Movilidá, Manuel Aurelio Martín dieron a conocer los detalles d’esta propuesta de reforma del frente urbanu del paséu d’El Muro col oxetivu d’aumentar los itinerarios peatones y la renaturalización del espaciu con amplies zones verdes. Plantega plataforma única, más anchu d’aceres, carril bici, zones estanciales, espacios con xuegos infantiles y un carril de serviciu.

L’actuación sería sobre 98.200 metros cuadraos, de los que 75.000 destinaríense al espaciu peatonal, 21.150 a la bicicleta y l’automóvil, y 2.000 a construcciones de serviciu. Al paséu tradicional añádese, onde agora ta’l nomáu cascayu, un camín nuevu arrodiáu de vexetación, y amplíase hasta los 6 metros l’acera onde s’asitien los edificios.

Va destinase espaciu tamién pa terraces hosteleres y puestos de venta, cola intención de reactivar económicamente la zona, y van entamase actuaciones especiales n’El Náutico, la zona de Les Chapones o la rotonda d’El Piles. El so plazu d’execución sería de 36 meses y el so costu estimáu, de 15,8 millones d’euros.

Esta iniciativa del equipu de gobiernu municipal del PSOE y Xixón pela Izquierda (IX-IAS) va debatise agora col texíu social del conceyu pa ver la receptividá que tien ente la ciudadanía.